支援
有問題、想加入測試，或者想刪除帳戶，由呢度開始。
聯絡我哋
- App 入面：「說明與意見回饋」›「寫信給我們」，唔使登入。開住「附上診斷資料」，我哋可以更快搵到原因；我哋嘅回覆會喺同一頁嘅「我的報告」出現。
- 電郵：support@moqikey.com
加入測試
MoqiKey 仲未上架 Google Play，而家測試緊。
- 寫電郵去 support@moqikey.com，話我哋知你想加入測試，再附上你部 Android 手機嘅型號。
- 手機要係 Android 8.0 或以上。暫時未有 iPhone 版。
- 我哋會回覆話你知點樣安裝。
- 測試版可能會有 bug。遇到問題，用 App 入面嘅「說明與意見回饋」話我哋知最快。
常見問題
鍵盤冇彈出嚟，或者打唔到想要嘅字？
打開 MoqiKey，喺首頁嘅「開始使用」完成頭兩步：喺系統設定開啟 MoqiKey，再切換做 MoqiKey。要用嘅輸入方式喺「鍵盤設定」揀語言再開啟，例如「繁體中文（香港）」入面嘅倉頡同拼音（粵語）；地球鍵會喺開咗嘅輸入方式之間切換，撳住地球鍵就可以直接滑去想用嗰個。想轉去其他鍵盤 App，撳螢幕下面導航列嘅鍵盤圖示。想打速成，就喺倉頡鍵盤撳「速」。
倉頡（包括速成）、筆劃、拼音（粵語），同埋日文、韓文、泰文、越南文鍵盤都要用「語言包」，第一次開啟會自動下載，記得連住網絡。鍵盤上面出現「要先下載語言包」嘅話，撳「下載」，下載完就打得字。
MOQI 助手點用？
喺聊天 App 長撳對方嘅訊息，揀「複製」（對方一連傳咗幾個訊息，就逐個複製），再撳鍵盤工具列上面嘅 MOQI 助手，揀「看懂對方」或者「幫我寫」。亦可以叫 MOQI 讀聊天截圖。
MOQI AI 使唔使登入？
MOQI AI 可能要用 Google 帳戶登入，咁每個人用咗幾多次先計得清楚，亦都比較容易防止濫用。需要登入嘅時候，去 App 首頁最上面嘅「帳戶」登入，登入時要確認你已滿 18 歲。打字、揀字、手寫同剪貼簿都唔使登入。
AI 次數用完咗點算？
每部手機同每個帳戶每日用得幾多次 AI 都有上限，第二日就會重新計。今日用咗幾多次，可以喺 App 嘅「用量」睇。
AI 成日出錯或者連唔到？
先確認有網絡。VPN、廣告攔截 App 或者公司網絡有時會擋住連線，可以轉用流動數據再試。去「AI 與金鑰」撳「測試連線」，就睇到係邊度出問題。都係唔得就寫電郵俾我哋，附上診斷資料可以幫我哋更快搵到原因。
點樣閂咗自動翻譯或者說話風格嘅學習？
「複製外文訊息就自動翻譯」同「MOQI AI 語音輸入」喺設定嘅「AI 與金鑰」閂；說話風格嘅學習喺「我的說話風格」閂。邊啲情況會將內容送去伺服器，寫咗喺私隱政策。
AI 嘅回覆唔啱或者唔恰當，點樣話你哋知？
喺 MOQI 嘅回覆下面撳「報告這則回覆」。會先顯示要送出嘅內容，確認咗先會送出；亦可以揀「只存在手機」。
換手機或者重新安裝，啲資料會唔會唔見？
對象檔案、說話風格同學到嘅詞都只存喺呢部手機。換手機或者重新安裝之前，去「資料轉移」匯出一個用密碼加密嘅檔案，喺新手機匯入就可以繼續用。
刪除帳戶
- 喺 App 入面：「帳戶」›「刪除帳戶」，再用同一個 Google 帳戶確認一次，即刻刪除，冇得復原。
- 用唔到 App 嘅時候（例如手機唔見咗）：去刪除帳戶嘅網頁填寫登入用嘅電郵地址，送出申請。我哋會喺 7 日內處理：先寄電郵去呢個地址確認係你本人，再刪除。
- 有 MoqiKey Plus 訂閱嘅話：刪除帳戶唔會取消 Google Play 嘅訂閱，亦唔會退款。請先喺 Google Play 嘅「付款和訂閱」取消，再刪除帳戶。
- 手機上嘅資料（對象檔案、說話風格、學到嘅詞、設定）唔受影響；要刪除就解除安裝 App。
- 邊啲資料會刪除、邊啲會保留，寫咗喺私隱政策第 14 節。
我哋絕對唔會問你攞嘅嘢
MoqiKey 唔會用任何方式（電郵、訊息、電話或者 App 入面）問你攞：
- 密碼，包括你嘅 Google 帳戶密碼
- 短訊驗證碼、登入代碼或者任何一次性密碼
- 信用卡號碼或者銀行戶口號碼（收費計劃只會經 Google Play 付款）
- 叫你過數、轉帳，或者買點數、禮品卡
- 俾錢買兌換碼（MoqiKey 嘅兌換碼只會免費派）
有人自稱 MoqiKey 問你攞呢啲嘢，千祈唔好俾，並寫電郵去 support@moqikey.com 話我哋知。
報告安全問題
發現 MoqiKey 嘅 App、伺服器或者網站有安全問題，請寫電郵去 support@moqikey.com，喺我哋修好之前暫時唔好公開。
網站用到嘅資料
首頁嘅速成試打鍵盤，碼表取自 Cangjie5 同 Cangjie3-Plus（MIT License・© 朱邦復（發明）／倉頡之友·馬來西亞、倉頡三代與五代補完計劃（修訂）），同 App 嘅倉頡、速成碼表同一個來源；候選字嘅先後次序同 App 一樣，係根據 libchewing-data 嘅 v4 語言模型（CC BY 4.0・libchewing Core Team）排。網站鍵盤入面嘅注音字表取自 libchewing-data（LGPL-2.1-or-later・Copyright (c) libchewing Core Team）。App 用到嘅開放源碼軟件同資料，列咗喺 App 嘅「關於與授權」。